Plantun de Prouvènço

Pèr coumpara dos planto d'encò nostre

Carduus acicularis & Crithmum maritimum

Carduus acicularis

Asteraceae Compositae

Noms en français : Chardon à aiguilles, Chardon à épingles.

Descripcioun :
Cardoun rare, pas trop grand, que fai de pichòti flour (coumpausado) en generau souleto. I'agrado lis ermas e li mitan secarous coume li ribo de camin. Se destrìo dis àutri cardoun emé de pichòti tèsto qu'a li bratèio primo e pounchudo coume d'aguïo (fotò). A peréu li fueio blanquinouso. Coumpara emé lis àutri cardoun qu'an de pichòti tèsto que soun mai coumun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : Pancaro entresigna
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Carduus
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Roso
Petalo : >6
Ø (o loungour) flour : Pancaro entresigna
Flourido : Estiéu - Autouno - Ivèr

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero

Liò : Tepiero seco - Camin
Estànci : Mesoumediterran
Couroulougi : Pancaro entresigna
Ref. sc. : Carduus acicularis Bertol., 1829

Fenoui-de-mar

Crithmum maritimum

Apiaceae Umbelliferae

Àutri noum : Sausseiroun, Bacilo.

Noms en français : Criste-marine, Fenouil marin.

Descripcioun :
Lou fenoui-de-mar es uno planto poupouso coumuno que trachis sus li roucas o dins la sablo en ribo de mar. Se recounèis eisa à si fueio penado.

Usanço :
Es uno planto manjadisso que gagnarié à èstre couneigudo ; lou goust ramento aquéu de la pastenargo, mai pu cousènt. Ero manjado au nostre, crus o cuecho coume de liume. Peréu es uno bono planto, vertuouso contro lou mau-de-terro (richo en vitamino C), depurativo, estimulanto, ajudo à pissa e à digeri. Bono pèr la pèu, n'en bouton dins de crèmo e proun de poutingo à l'ouro d'aro.